 Rákahöfrung
rekur á Héraðssand Þann 29. mars fundu Skúli Sveinsson og Halldór W. Stefánsson nýrekinn höfrung á Háraðssandi. Skarphéðinn G. Þórisson starfsmaður Náttúrustofunnar fór síðar um daginn með Halldóri og Reimari Ásgeirssyni til að kanna hvalrekann betur. Gísli Víkingsson hvalasérfræðingur á Hafrannsóknarstofnun greindi hvalinn eftir myndum sem rákahöfrung (Stenella coeruleoalba). Höfrungurinn var sendur Hafró í heilu lagi. Næsta haust er Spendýrabók Vöku-Helgafells væntanleg og var Gísli Víkingsson svo vinsamlegur að leyfa okkur að skoða kaflan um rákahöfrunginn. Þar kemur fram að tegundin er fyrst og fremst bundin við hitabeltis- og heittempruð svæði allt í kringum hnöttinn. Hann er algengasti höfrungurinn í Miðjarðarhafi og ein algengasta hvalategund úthafanna. Fyrir hafði rákahöfrung rekið þrisvar á land (einu sinni fjögur dýr) og er þetta því sjöunda dýrið. Nánari fróðleik um tegundina geta menn aflað sér þegar fyrrnefnd spendýrabók kemur út. Rákahöfrungur á Héraðssandi. Ljósm. SGÞ. Rákahöfrungur á Héraðssandi. Ljósm. SGÞ.
Reimar Ásgeirsson, Halldór W. Stefánsson og rákahöfrungurinn á Héraðssandi. Ljósm. SGÞ.
|
