Hasskötturinn - Árangursríkt samstarf fræðaseturs í Búlandinu
Uppfært 27/05/04

Nemendur í Verkmenntaskóla Austurlands sigruðu landskeppni Ungra vísindamanna fyrr í þessum mánuði með verkefni sínu Hasskettinum og verða því fulltrúar Íslands í Evrópukeppni Ungra Vísindamanna ásamt nemanda frá Fjölbrautaskólanum við Ármúla sem haldin verður í Dublin í haust.

Forsaga málsins er sú að í byrjun þessa árs var ákveðið að efna til samstarfs mennta- og rannsóknastofnana í Búlandinu þegar Verkmenntaskóla Austurlands skráði sig til þátttöku í verkefninu Ungir Vísindamenn.  Auk Verkmenntskólans komu Náttúrustofa Austurlands og Rannsóknastofnun fiskiðnaðarins og lögregluvarðstjórinn í Neskaupstað að verkefninu.

Þrír nemendur, þau Eva María Þrastardóttir, Elísa Brynjólfsdóttir og Stefán Þór Eysteinsson tóku þátt í vekefninu undir leiðsögn líffræðingsins, bóndans og kennarans Þórðar Júlíssonar frá Skorrastað. Fljótlega kviknaði hugmynd að skemmtilegu verkefni sem fékk heitið Hasskötturinn þar sem viðfangsefnið var að kanna hvort mögulegt er að nota ketti við hassleit.  Til þess að svara rannsóknarspurningum sínum notuðu vísindamennirnir aðferðir sálfræði og líffræði og tileinkuðu sér vísindaleg vinnubrögð og framsetningu efnis.  Nemendur framkvæmdu tilraun með kettina tvo: Einn og Tveir í þar til gerðum þjálfunarkössum þar sem kettirnir voru látnir leita að ákveðinni lykt.  Í stað hass voru tepokar notaðir og þannig færðu vísindamenn rök fyrir því að hægt væri að temja ketti til að nota lyktarskynið og þar með að þjálfa þá til fíkniefnaleitar.

  Við óskum Evu Maríu, Elísu og Stefáni Þór til hamingju með glæsilegan árangur og óskum þeim góðs gengis í Dublin í haust.

Sjá líka frétt um Unga Vísindamenn frá í febrúar sl. 

 

© Náttúrustofa Austurlands   
Mýrargötu 10,   740 Neskaupstað,  Sími: (+354) 477-1774,  Símbréf: (+354) 477-1923 
Kennitala: 461094-2529 , Netfang: na@na.is
Miðvangi 2,   700 Egilsstaðir,   Sími: (+354) 471-2813, Símbréf (+354) 471-2172
Bannað er að afrita myndir af vef þessum nema með skriflegu leyfi frá Náttúrustofu Austurlands