Álft (Cygnus cygnus)
Álftin er stærsti varpfugl Íslands. Hún er eini innlendi fuglinn af ættkvísl svana og getur orðið allt að 160 cm löng og vegið 10 kg. Álftir fljúga með kröftugum, hægum vængjatökum enda getur vænghafið orðið næstum 2,5 m á lengd.
Álftir lifa langmest á jurtafæðu, einkum ýmsum vatnajurtum og verpa helst við vötn og tjarnir á hálendinu. Yfirleitt er bara eitt par við hvert vatn eða tjörn.
Svanasöngur á heiði
Ég reið um sumaraftan einn
á eyðilegri heiði;
þá styttist leiðin löng og ströng,
því ljúfan heyrði’ eg svanasöng,
já, svanasöng á heiði.
Á fjöllum roði fagur skein,
og fjær og nær úr geimi
að eyrum bar sem englahljóm,
í einverunnar helgidóm,
þann svanasöng á heiði.
Svo undurblítt ég aldrei hef
af ómi töfrast neinum;
í vökudraum ég veg minn reið
og vissi’ ei, hvernig tíminn leið
við svanasöng á heiði.
Steingrímur Thorsteinsson
Nánar má lesa um álftina á Íslenska fuglavefnum og Vísindavefnum.