Margrét Gísladóttir ráðin til Náttúrustofu Austurlands
Margrét Gísladóttir hefur verið ráðin til Náttúrustofu Austurlands, en sautján sóttu um starf sem auglýst var í nóvember síðast liðinn. Margrét er jarðfræðingur að mennt og starfaði áður sem landvörður á hálendinu norðan Vatnajökuls. Sérsvið hennar er umhverfisjarðfræði, þá helst umhverfis-og loftslagsbreytingar en hún hefur vítt áhugasvið sem teygir sig inná marga anga náttúrufræðinnar, þá einna helst gróðurfar og náttúruvernd. Margrét hóf störf 16. febrúar og við bjóðum hana velkomna til starfa.
Náttúrustofu Austurlands flytur í nýtt húsnæði
Náttúrustofa Austurlands hefur nú flutt aðalskrifstofu sína í Múlann, að Bakkavegi 5 í Neskaupstað.
Náttúrustofan hefur frá árinu 1999 haft aðstöðu í húsnæði Verkmenntaskóla Austurlands með Matís (áður Rannsóknastofnun fiskiðnaðarins) og fleiri fyrirtækjum og einstaklingum. Eftir góðan tíma þar taka nú við spennandi tímar í þessum nýja klasa.
Múlinn er samvinnuhús þar sem nokkur fyrirtæki og stofnanir koma saman á einum stað. Samvinnufélag útgerðamanna í Neskaupstað SÚN stendur að baki Múlanum, en búið er að gera upp eldri byggingu og byggja myndarlega við það húsnæði sem áður hýsti verslunina Nesbakka og þar áður útibú Kaupfélagsins Fram.
Auk Náttúrustofunnar verða í Múlanum starfsstöðvar Matís, Austurbrú, Deloitte, Stapa, Origo, Advania, Nox Health, MAST, Hafró og mögulega fleiri.
Við erum spennt fyrir nýjum breytingum á sama tíma og við kveðjum sambýlinga okkar í Verkmenntaskóla Austurlands með söknuði.